प्रा. एन्. टी. चौधरी यांचे निधन ... शिक्षकांच्या प्रश्नासाठी झटणारा आवाज हरपला ...

चोपडा (प्रतिनिधी) :--

          प्रा. एन्. टी. चौधरी यांचे निधन...

      शिक्षकांच्या प्रश्नासाठी झटणारा आवाज हरपला...

      मुळगाव तावसे बू!! ता चोपडा व नोकरीस रोहा तालुक्यातील रिलायन्स फाऊंडेशन स्कूल नागोठणे या शाळेत कार्येरत असलेले अभ्यासू भौतिकशास्त्र विषयाचे महाविद्यालयीन शिक्षक प्रा. निंबा तुळशीराम चौधरी याचे पहाटे ४ वाजून १५ मिनिटांनी हृदय विकाराच्या तिव्र झटक्याने निधन झाले. त्यांचे मूळ गाव तावसे बु!! चोपडा जि. जळगाव असून ते जून १९९६ पासून नागोठणे या शाळेत भौतिकशास्त्र विषयाचे अध्यापन करत होते. त्यांची जन्मतारीख ५ सप्टेंबर १९६५ हा शिक्षक दिन असून विहित नियमानुसार ते सप्टेंबर २०२३ मध्ये निवृत्त होणार होते परंतु त्या आधीच १४ एप्रिल  डॉ. आंबेडकर जयंती दिनी त्यांनी जगाचा निरोप घेतला. रिलायन्स फाऊंडेशन स्कूल आणि पंचक्रोशीत प्रा. चौधरी हे अतिशय अभ्यासू व विद्यार्थी प्रिय शिक्षक म्हणून प्रख्यात होते. विद्यादानाबरोबरच ते वारकरी संप्रदाय, स्वाध्याय परीवार या सर्वांमध्ये ते अभ्यासू अध्यात्मिक प्रवचनकार म्हणून ही सुपरिचित होते. भगवद्गीता, ज्ञानेश्वरी, तुकाराम गाथा, हरिपाठ, दासबोध इत्यादी ग्रंथाबरोबरच आधुनिक साहित्याचा ही त्यांचा गाढा अभ्यास होता.

       शिक्षक म्हणून काम करत असताना कुठेही शिक्षकांवर अन्याय झाला की धावून जाणे हा सरांचा स्वभाव होता. विद्यापीठ आयोग, मुदलीयार आयोग, १९८६ चे नवे शैक्षणिक धोरण ,१९८१ चे शिक्षक संहिता तसेच वेळोवेळी निघणारे शिक्षण खात्याशी संबंधित जी आर सरांच्या तोंडपाठ असत. शिक्षकाच्या प्रश्नावर सर नेहमीच पोटतिडकीने बोलत व शिक्षकांना न्याय मिळवून देण्यासाठी सतत प्रयत्न करत. शिक्षकांच्या प्रश्नांवर लढणारा शिक्षकांचा आवाज आज आसमंतात कायमचा विरल्याने अनेक शिक्षकांना अश्रू अनावर झाले. 

     प्रा. एन टी चौधरी व प्रा. एल टी चौधरी या दोघे बंधूंनी चोपडा शहरांतील गुजरअळी भागात सर्वप्रथम कोचिंग क्लासेसच्या माध्यमातून आपल्या कारकिर्दीला सुरुवात केली होती. अल्पावधीतच दोघे बंधूं विदयार्थी प्रिय झालेत. त्यांनी आपल्या ज्ञानाचा ठसा आपल्या ज्ञान दानातून उमटविला. परंतू नंतर दोघे बंधू नोकरीच्या निमित्ताने नागोठणे येथे स्थायिक झाले. गावापासून कोसो दूर अंतरावर देखील त्यांनी आपल्या ज्ञानशिलतेची छाप पाडली. आज समाजातील प्रत्येक व्यक्ती प्रा. एन टी चौधरी यांना कायम स्मरणात ठेवेल.

      पेण, रोहा, ठाणे, नवी मुंबई, जळगाव, पुणे येथून त्यांच्या परिचित शिक्षक व नातेवाईक त्यांच्या अंत्यविधीला मोठ्या संख्येने हजर होते.

           💐 💐  भावपूर्ण  श्रद्धांजली   🌹🌹