ध्यास निसर्ग सेवेचा... जागर चिमणी संवर्धनाचा ; 20 मार्च जागतिक चिमणी दिनानिमित्त विवेकानंद विद्यालयात मोफत जलपात्र वितरण

 चोपडा (प्रतिनिधी) : - -

ध्यास निसर्ग सेवेचा... जागर चिमणी संवर्धनाचा 

         20 मार्च जागतिक चिमणी दिनानिमित्त विवेकानंद विद्यालयात मोफत जलपात्र वितरण

        चोपडा तालुक्यासह सर्वत्र होत असलेले वाढते प्रदूषण , वृक्षतोड , मोबाईल टॉवर्सद्वारे निर्माण होणाऱ्या लहरी , पिकांवरील अतिघातक रसायनांची फवारणी , नैसर्गिक अधिवासाचा ऱ्हास , काँक्रीट इमारतींचे बांधकाम , ऋतुचक्रातील बदल इ. सारख्या अनेक कारणांनी चिमणी व परिसरातील सामान्य पक्ष्यांची संख्या गेल्या दोन - तीन दशकांपेक्षा जास्त कालावधी पासून रोडावत चालली आहे. पक्षी हे निसर्ग साखळीतील महत्त्वाचे घटक व वसुंधरेचे बोलके अलंकार आहेत.

           त्यांचे संवर्धन व संरक्षण खूप महत्त्वाचे आहे , या विचाराने विद्यार्थ्यांना प्रेरित करण्यासाठी पक्षी , वन्यजीव व वन संवर्धनासाठी कार्यरत असलेले विद्यालयाचे शिक्षक , पक्षी व वन्यजीव अभ्यासक श्री हेमराज पाटील (संस्थापक - सातपुडा निसर्ग संवर्धन संस्था , चोपडा तसेच केंद्रीय समिती सदस्य - वन्यजीव गुन्हे नियंत्रण विभाग , दिल्ली) यांनी 20 मार्च जागतिक चिमणी दिनानिमित्त विवेकानंद विद्यालयातील इयत्ता पाचवीच्या विद्यार्थ्यांना 150 मातीचे जलपात्र मोफत वितरित केले. गेल्या दहा वर्षांपासून मोफत जलपात्र वितरणाचा कृती कार्यक्रम यशस्वीरित्या अखंडितपणे सुरू आहे. तसेच उन्हाळ्यात अजून जलपात्र वितरणाचे निसर्ग सेवा कार्य सुरू राहणार आहे.
          या प्रबोधनपर कृती कार्यक्रमाच्या उद्घाटन प्रसंगी मुख्याध्यापक श्री नरेंद्र भावे , उप मुख्याध्यापक श्री पवन लाठी यांनी वृक्ष पूजन व जलार्पण केले. श्री हेमराज पाटील यांनी विद्यार्थ्यांना परिसरात आढळून येणारे सामान्य पक्षी व चिमण्यांची माहिती, त्यांची दिनचर्या व निसर्ग साखळीतील महत्त्व याविषयी मार्गदर्शन केले. विद्यार्थ्यांना प्रोजेक्टरवर चिमण्यांची माहिती चलचित्र स्वरूपात दाखविण्यात आली. मुख्याध्यापक श्री नरेंद्र भावे यांनी जलपात्र लावण्या संबंधी मार्गदर्शन करून नियमित भरण्यासाठी आग्रह केला. विद्यार्थ्यांनी चिमणी संवर्धनासाठी नियमित जलपात्र भरून अन्न पाण्याची व्यवस्था करण्याचा दृढ संकल्प व्यक्त केला.

         उपक्रम यशस्वीतेसाठी विद्यालयाचे तंत्रस्नेही कला शिक्षक राकेश विसपुते, संजय खैरनार, प्रतीक चौधरी, सरला शिंदे, माधुरी हळपे, स्मृती माळी, मदतनीस राजू गोसावी, प्रकाश जाधव, सातपुडा निसर्ग संवर्धन संस्थेचे सदस्य आर्यदीप पाटील, अश्विनी पाटील, छोटू कुंभार यांचे अनमोल सहकार्य लाभले. पक्षी संवर्धन कृती उपक्रमाबद्दल संस्थेचे अध्यक्ष डॉ विकास हरताळकर, माजी अध्यक्ष डॉ विजय पोतदार, उपाध्यक्ष घनश्यामभाई अग्रवाल, सचिव अँड रवींद्र जैन, सहसचिव डॉ विनीत हरताळकर व संचालक मंडळ यांनी नवोपक्रमाबद्दल सर्व शिक्षक व विद्यार्थ्यांचे कौतुक केले.