चोपड्यात नवरात्री उत्सव, वाहनोत्सव व उद्या रथोत्सव उत्सहात साजरा होणार....

 

चोपडा (प्रतिनिधी) : - -

           चोपड्यात नवरात्री उत्सव, वाहनोत्सव व उद्या रथोत्सव उत्सहात साजरा होणार....

           चोपडा येथील श्री व्यंकटेश बालाजी संस्थांनाचा सुमारे शेकडो वर्षांची परंपरा असलेला वहनोत्सव व रथोत्सव दि. 11 ते 23 ऑक्टोबर दरम्यान शहरात साजरा होणार असल्याची माहिती संस्थानच्या विश्वस्तांनी दिली. चोपड्याच्या या सांस्कृतिक वारसा असणाऱ्या या महोत्सवाला 11 तारखेपासून वहनोत्सवाने सुरुवात होणार आहे. वहनोत्सव दररोज धार्मिक विधीनंतर व्यंकटेश बालाजीच्या जयघोशात वाजत गाजत रात्री 9 वाजेनंतर मंदिरापासून वहन निघेल. यात 11 तारखेला हत्तीचे वहन असून त्याचा मार्ग गांधी चौक, बाजारपेठ असा असेल. तर 12 तारखेला चंद्राचे वहन असून त्याचा मार्ग मोठा देव्हारा, गणेश कॉलनी, तर 13 तारखेला सिंहाचे वहन असून त्याचा मार्ग अरुणनगर, श्रीराम नगर, 14 तारखेला मोराचे वहन गुजर अळीत जाईल, 15 तारखेला नागोबाचे वहन सुंदरगढीत गेले, 16 तारखेला गरुडाचे वहन जबरेराम मंदिर व भाटगल्लीत गेले, 17 तारखेला मारुतीचे वहन बडगुजर गल्लीत गेले, 18 तारखेला सूर्याचे वहन पाटील गढीत व मल्हारपुरा येथे गेले, 19 तारखेला वाघाचे वहन गुजराथी गल्लीत गेले, 20 तारखेला दसऱ्याच्या दिवशी घोड्याचे वहन बाजारपेठत, तर 21 तारखेला आज बत्तीस पुतळे चे वहन गांधी चौक, बाजारपेठ या मार्गावरुन गेले.

        श्री व्यंकटेश बालाजी संस्थानचा खान्देशात सुप्रसिद्ध असलेला व एकादशीला साजरा रथोत्सव उद्या दि. 22 व 23  ऑक्टोबरला होणार आहे. दि. 22 रोजी सकाळी 10 वाजता गोलमंदिरा जवळील श्री बालाजी मंदिरा पासून श्री बालाजी महाराजांच्या रथोत्सवाला प्रारंभ होईल. आशा टॉकीज, ग्रामदैवत श्री आनंदी भवानी मंदिर मार्गाने रथ आठवडे बाजार, पाटील दरवाजा मार्गाने छत्रपती शिवाजी महाराज चौकात येईल मारुती मंदिरा जवळ रात्रभर भाविकांच्या दर्शनासाठी रथ मुक्कामी राहिल. तर दि. 23 रोजी रथाच्या परतीच्या प्रवासाला मारुती मंदिरा पासून सकाळी 10 वाजता प्रारंभ होईल. बाजारपेठ मार्गाने पुन्हा गोलमंदिरा जवळ येवून यंदाच्या वहनोत्सव रथोत्सवाचा समारोप होईल.

         या रथोत्सव काळात शहरात 2 दिवसाची रथयात्रा ही भरते. तसेच नवरात्र उत्सवची सांगता अर्थात देवींच्या विसर्जनाची मिरवणूकही मोठ्या भक्तीभावाने निघते शहराच्या श्रध्देचा भाग असलेल्या सांस्कृतिक व धार्मिक कार्यक्रमात नागरिक बहुसंख्येने सहभागी होऊन या धार्मिक कार्यक्रमाचा आनंद घेतात.