जागतिक चिमणी दिनानिमित्त 20 मार्च रोजी चोपड्यात मोफत जलपात्र वाटप ...

 

चोपडा (प्रतिनिधी) : - -

          जागतिक चिमणी दिनानिमित्त 20 मार्च रोजी चोपड्यात मोफत जलपात्र वाटप ...

         चोपडा शहर परिसरातील कमी होत जाणारी हिरवळ , वृक्षतोड , मोबाईल टॉवरच्या लहरी , घातक प्रदूषण , पिकांवरील अतिघातक रसायनांची फवारणी , नैसर्गिक अधिवासाचा ऱ्हास , काँक्रीट इमारतींचे बांधकाम , ऋतुचक्रातील बदल इ. सारख्या अनेक कारणांनी चिमणी व परिसरातील सामान्य पक्ष्यांची संख्या गेल्या दोन - तीन दशकांपेक्षा जास्त कालावधी पासून रोडावत चालली आहे. पक्षी हे निसर्ग साखळीतील महत्त्वाचे घटक व वसुंधरेचे बोलके अलंकार आहेत. त्यांचे संवर्धन व संरक्षण खूप महत्त्वाचे आहे , या विचाराने नागरिकांना मार्गदर्शन करत हेमराज पाटील (प्रमुख - सातपुडा निसर्ग संवर्धन संस्था) यांनी श्री स्वामी समर्थ महाराज मठ , शिंदे वाडा आणि श्रीराम मंदिर , गांधी चौक चोपडा या ठिकाणी उपस्थित भाविकांना जागतिक चिमणी दिन व वन दिन निमित्त 101 पेक्षा अधिक मातीचे जलपात्र मोफत वितरित केले. मोफत जलपात्र वितरणाचा कृती कार्यक्रम यशस्वीरित्या अखंडितपणे सुरू असल्याचे हे बारावे वर्ष आहे. तसेच उन्हाळ्यात अजून जलपात्र वितरणाचे निसर्ग सेवा कार्य सुरू राहणार आहे.

        या प्रबोधनपर कृती कार्यक्रमाच्या प्रसंगी परिसरात आढळून येणारे सामान्य पक्षी व चिमण्यांची माहिती , त्यांची दिनचर्या व निसर्ग साखळीतील महत्त्व याविषयी मार्गदर्शन केले. जनजागृती करणारे छापील माहिती पत्रके देण्यात आले. जलपात्र तसेच पर्यावरण पूरक घरटे लावण्यासंबंधी उपस्थित भाविकांना आग्रह केला. तप्त उन्हाने डीहायड्रेट झालेले पक्षी अथवा असहाय्य जखमी पक्षी आढळल्यास मदतीसाठी सातपुडा टीमला 9922085434 क्रमांकावर संपर्क करण्याचे आवाहन करण्यात आले. उपस्थित भाविक बंधू-भगिनींनी पक्षी संवर्धनासाठी केलेल्या आवाहनाला कृती करून पूर्णतः मदत करण्याचा दृढ संकल्प आपल्या प्रतिक्रियांमधून दिला.

         उपक्रम यशस्वीतेसाठी मंदिरांचे पुजारी पुरुषोत्तम एकडीकर महाराज , भूषण देवळे महाराज , सातपुडा निसर्ग संवर्धन संस्थेचे अश्विनी पाटील , घनश्याम वैद्य , योगेश देवराज , अमोल डूडवे , आर्यदीप पाटील , अश्फाक पिंजारी , राहुल महाजन , नंदिनी कुंभार , कृष्णप्रिया पाटील यांनी परिश्रम घेतले.