चोपड्यात अतिशय दुर्मिळ व विषारी ‘पोवळा’ सापाचा अनपेक्षित आढळ ; सर्पमित्राच्या तत्परतेमुळे मिळाले जीवदान ! ! !

 

चोपडा (प्रतिनिधी) : - -

         चोपड्यात अतिशय दुर्मिळ व विषारी ‘पोवळा’ सापाचा अनपेक्षित आढळ ; सर्पमित्राच्या तत्परतेमुळे मिळाले जीवदान ! ! !

         चोपडा शहरातील सुंदर गढी परिसरामध्ये एका अत्यंत दुर्मिळ आणि अतिशय विषारी असलेल्या ‘पोवळा’ (Slender Coral Snake) प्रजातीच्या सापाचा अनपेक्षित आढळ झाल्याने वन्यजीवप्रेमींमध्ये कमालीची उत्सुकता निर्माण झाली आहे. सर्पमित्राच्या तत्परतेमुळे या सापाला यशस्वीरित्या पकडून निसर्गाच्या सानिध्यात सुरक्षित जीवदान देण्यात आले.

         सुंदर गढी येथील रहिवासी अजय दत्तात्रय देवरे यांच्या घराशेजारील दगड आणि पालापाचोळ्याच्या ढिगाऱ्यात एक लहान साप हालचाल करताना दिसून आला. देवरे यांनी कोणतीही घाईगडबड न करता तातडीने स्थानिक सर्पमित्र कल्पेश सूर्यवंशी यांच्याशी संपर्क साधून त्यांना पाचारण केले. कल्पेश सूर्यवंशी यांनी घटनास्थळी धाव घेत, अत्यंत सावधगिरी बाळगत त्या सापाला सुरक्षितपणे पकडले. सापाचे बारकाईने निरीक्षण केले असता, तो भारतीय उपखंडातील सर्वात लहान आणि विषारी मानला जाणारा ‘पोवळा’ (शास्त्रीय नाव : Calliophis melanurus) प्रजातीचा साप असल्याचे स्पष्ट झाले.

सर्पमित्र - कल्पेश सूर्यवंशी  संपर्क - 7558670713                             

          चोपडा परिसरात या सापाचा आढळ होणे ही अत्यंत दुर्मिळ बाब असल्याने, सर्पमित्र कल्पेश यांनी तातडीने ‘सातपुडा निसर्ग संवर्धन संस्थे’चे पक्षी व वन्यजीव अभ्यासक हेमराज पाटील यांच्याशी संपर्क साधून माहिती दिली. हेमराज पाटील , निकेतन ठाकूर यांनीही पाहणी करून हा साप ‘पोवळा’च असल्याच्या वृत्ताला दुजोरा दिला. कल्पेश सूर्यवंशी यांच्या या कौतुकास्पद कामगिरीबद्दल स्थानिक नागरिक आणि सातपुडा टीमच्या सर्व सदस्यांनी त्यांचे विशेष अभिनंदन केले आहे.

         पोवळा हा साप लाजाळू व निशाचर (रात्री फिरणारा) स्वभावाचा असल्यामुळे तो माणसाला सहसा चावत नाही. याचे विष मज्जासंस्थेवर (Neurotoxic) परिणाम करणारे असले, तरी याच्या दंशामुळे मानवी मृत्यू झाल्याच्या नोंदी अत्यंत दुर्मिळ आहेत. हा साप आकाराने खूप लहान असून त्याची कमाल लांबी ४० सेमी असते. त्याचे शरीर सडपातळ व फिकट तपकिरी रंगाचे असून त्यावर बारीक काळे ठिपके असतात. त्याचे डोके पूर्णपणे काळ्या रंगाचे असते. या सापाची शेपटी निळसर-काळी किंवा गडद काळ्या रंगाची असते. स्वतःचा बचाव करताना किंवा धोका जाणवल्यास तो शेपटी वर करून शत्रूला घाबरवण्याचा प्रयत्न करतो. हा साप प्रामुख्याने पानगळीची जंगले, गवताळ प्रदेश आणि दमट भागात पालापाचोळ्याच्या किंवा जमिनीच्या आत दडून राहणे पसंत करतो.